Bugun “O’zbekiston temir yo’llari” aksiyadorlik jamiyatining faollar zalida 8 mart – Xaqaro xotin-qizlar kuni munosabati bilan tantanali bayram tadbiri va konsert dasturi o’tkazildi.
Bayram tadbirida dastlab Jamiyat boshqaruvi raisi v.b. X.Xasilov so’zga chiqib, barcha temiryo’lchi ayollarni ushbu go’zal ayyom bilan chin dildan muborakbod etdi.
– Shuni alohida mamnuniyat bilan ta’kidlashni xohlardimki, bugungi kunda sohamizda 14 mingdan ortiq xotin-qizlar faoliyat yuritmoqda, – deya alohida ta'kidladi X.Xasilov. – Temir yo‘l sohasida yuk va yo‘lovchi tashish, ishlab-chiqarishdagi yuqori ko‘rsatkichlarga erishish hamda mamlakatimiz hayotidagi muhim bunyodkorlik ishlarida biz – erkaklar bilan yelkama-yelka turib mehnat qilayotganliklari yurtimizdagi barcha ayollarga o‘rnak bo‘lib kelmoqda. Hukumatimiz tomonidan temiryo‘lchi xotin-qizlar mehnati hamisha yuksak qadrlanib kelinmoqda. Shu kungacha 41 nafar temiryo‘lchi ayol turli davlat mukofotlari bilan, 120 nafari esa “Faxriy temiryo‘lchi” ko‘krak nishoni bilan taqdirlanganlar. Men o‘ylaymanki, bunday yutuqlar bardavom bo‘ladi, temiryo‘lchi ayollarimiz orasida mamlakatimizning yuksak e’tirofi va unvonlariga sazovor bo‘lganlar safi kengayib boradi.
Shuningdek, tadbirda, bugungi kunda sohamizning mehnatsevar va fidoyi xotin-qizlari sohamizning yo‘l xo‘jaligi, energiya ta’minoti, lokomotiv, vagon va konteynerlardan foydalanish, yo‘lovchi tashish xo‘jaliklari, loyiha va qurilish yo‘nalishlari kabi eng mas’uliyatli yo‘nalishlarida oddiy ishchi-xodimdan rahbar lavozimigacha faoliyat yuritib kelayotganiga ham alohida to‘xtalib o‘tildi, Xususan, ana shu barcha korxonalarda kadrlarga o‘z malaka va tajribalarini o‘rgatayotgan, ko‘p yillardan buyon mehnat qilib kelayotgan, pensiya yoshidagi ayol opalarimizga sadoqatli mehnatlari uchun chuqur minnnatdorlik bildirildi.
Tantanali tadbirning badiiy qismida el ardog’idagi san'atkorlarning kuy-qushiklari o’zgacha fayz bag’ishladi va bayramni ko’tarinki kayfiyatda o’tishiga omil bo’ldi.